На гэтых выходных я апынуўся у вялікім горадзе Магілёве. Ехаў я з Мінска і скажу, што для мяне гэтая паездка была даволі такі доўгай. Цягніком я ехаў з Мінска гадзіны тры. І вось я тут!
Шчыра кажучы, па прыездзе на вакзал я быў трохі расчараваны. Складалася ўражанне, што я не пабачу той «другі Мінск», як мне гэтага хацелася. Вакол стаялі дамы са старымі дахамі, а вакзальныя прыбіральні з выламанымі дзвярыма ствараюць жахлівыя ўражанні. Затое на вакзале маецца казіно «Вегас», так што турыстам ёсць дзе «прасадзіць» усе грошы.
На вакзале я сеў у 4-ты тралейбус і адправіўся ў цэнтр. Адразу кінулася ў вочы тое, што няма таблічак «ПРАЦУЕ КАНДУКТАР», а самі кандуктары ёсць. Я і ў іншых гарадах такое заўважаў, але было дзіўна менавіта ў Магілёве такое пабачыць.
У цэнтры я знайшоў месца пад назвай «Burger Pizza», дзе і вырашыў паснедаць. Салат Цэзар, суп з шампіньёнаў і вішнёвы сок абышліся мне ў 90 тысяч, што даволі дорага.
Затое ў цэнтры горада на пешаходнай вуліцы можна ўзяць танна ровар напракат -– 30 тысяч за гадзіну, наступная гадзіна + 10 тысяч.
Першым падчас сваёй роварнай вандроўкі па Магілёве я пабачыў Драматычны тэатр, які ўразіў сваёй архітэктурай. Здавалася, што ён нават больш за мінскі Купалаўскі.
Далей я паехаў на плошчу Свабоды, дзе пабачыў гарадскую Ратушу.
Адтуль жа адкрываецца прыгожы від на горад.
Асаблівай увагі заслугоўвае выканкам. Нічога не нагадвае? А цяпер здагадайцеся, дзе чый…
Цікава, што па ўсім горадзе стаяць невялічкія «Лаўкі», дзе можна набыць фагаціні і круасаны. Гэтыя лаўкі вельмі нагадваюць шапікі з кебабамі ў Польшы і Літве.
А яшчэ ў Магілёве вельмі шмат графіці, і, пакатаўшыся па горадзе, я заўважыў вось такую размаляваную вуліцу.
І канечне, я не мог не заўважыць пасярод горада сцены, абклееныя плакатамі Ляпісаў з бас-турамі ў Піцер. Так сімвалічна гэта выглядала.
Калі падвесці невялікі вынік, то трэба адзначыць, што горад вельмі прыгожы і ўтульны для жыхароў. А калі казаць пра турыстычны Магілёў — тут вялікія праблемы. Павандраваўшы ў жылых районах, вы нічога цікавага не знойдзеце, турыстычны Магілёў — гэта цэнтр горада. Але для таго, каб канчаткова ўпэўніцца ў гэтым, трэба параўнаць Магілёў з іншымі гарадамі, да чаго я і буду імкнуцца.
