Сяргея Шукана, які збіў гітарыста «Ляпіса Трубяцкога» Руслана Уладыку, асудзілі на 5 гадоў калоніі строгага рэжыму. Прысуд быў агучаны 21 верасня ў судзе Маскоўскага раёна Мінска. Мужчыну прызналі вінаватым у прычыненні смерці па неасцярожнасці, піша Еўрарадыё.
Таксама падсудны павінен заплаціць маральную кампенсацыю сястры і маці музыкі — 10 000 і 30 000 рублёў.
У каментары Еўрарадыё маці Уладыкі, Валянціна Пятроўна, сказала, што разлічвала на больш суровы прысуд — 10 гадоў, бо пракурор прасіў прызначыць 11. Да таго ж, сваякі Руслана лічаць, што нападнікаў было некалькі.
Само здарэнне адбылося больш за год таму. Увечары 6 ліпеня 2019-га гітарыста гурта «Ляпіс Трубяцкі» Руслана Уладыку знайшлі збітым у непрытомным стане каля бара на вуліцы Солтыса. Музыку шпіталізавалі, яму зрабілі некалькі аперацый. Аднак выратаваць Руслана дактары не змаглі. Ён паўгода прабыў у коме і 19 студзеня 2020 года памёр.
