Аляксандр Лукашэнка 17 верасня. Фота Вадзіма Заміроўскага, TUT.by
«Падобна да таго, што следам за прававым дэфолтам (гэта значыць немагчымасцю дзяржавы выконваць унутраныя абавязацельствы па забеспячэнні законнасці і правапарадку) Беларусь паслядоўна і ўпэўнена рухаецца да дэфолту замежнапалітычнага, — піша ў сябе ў фэйсбуку палітолаг, доктар палітычных навук Андрэй Казакевіч.
— Не спыняючыся на прамежкавых дасягненнях (накшталт жорсткага разгону пратэстаў 9-12 жніўня), улады, не без творчага падыходу і дзіўнай настойлівасці, кожны тыдзень ствараюць новыя і новыя падзеі ў гэтым кірунку — разгром… Каардынацыйнай рады, высылка палітыкаў, забарона на ўезд грамадзянам Беларусі, новыя крымінальныя справы і многае іншае (не кажучы ўжо пра шматлікія заявы А. Лукашэнкі).
Рана ці позна, такая настойлівасць павінна была даць свае вынікі. Магчыма цяперашні тыдзень стаў у гэтым сэнсе пераломным.
Вельмі жорсткая рэзалюцыя Еўрапейскага парламента (17.09), рашэнне Вярхоўнай рады Украіны (16.09), абмеркаванне Беларусі ў нямецкім парламенце (16.09), ну і сустрэча А. Лукашэнкі з У. Пуціным (14.09).
Усе падзеі нельга назваць спрыяльнымі, а на заходнім і паўднёвым кірунку гэта нагадвае сапраўдную замежнапалітычную катастрофу.
Вядома, усё гэта толькі накіды будучага падыходу да Беларусі і многае будзе залежаць ад далейшых падзей, але сітуацыя значна горшая, чым была калі-небудзь у мінулым. Не падобная ні да 2011, ні нават да 1996 гадоў — тады, па меншай меры, не было праблем з Украінай, а Расія была гатовая плаціць і плаціць шмат.
У рэзалюцыі Еўрапарламента найбольшую ўвагу СМІ прыцягвае раздзел аб санкцыях. Але найбольш цікавым падаецца іншае. Еўрапейскі парламент заклікае «замарозіць любыя сродкі, якія перадаюцца беларускаму ўраду, а таксама па праектах, якія рэалізуюцца пад кантролем дзяржавы», а таксама спыніць крэдытаванне дзеючай улады праз Еўрапейскі інвестыцыйны банк, Еўрапейскі банк рэканструкцыі і развіцця ды іншыя механізмы.
Калі гэта будзе рэалізавана на практыцы, яно пацягне цалкам рэальныя значныя фінансавыя страты — сотні мільёнаў ці нават мільярды еўра. Варта толькі ўспомніць, што яшчэ вясной урад Беларусі планаваў прыцягнуць ад ЕБРР каля 1 млрд еўра для падтрымання эканомікі ва ўмовах пандэміі. Гэта значыць суму цалкам параўнальную з памерам расійскага крэдыту. А ёсць яшчэ і бягучыя праекты.
Ёсць, акрамя іншага, у рэзалюцыі абзац і пра БелАЭС, якую ўлады плануюць запусціць у лістападзе», — адзначае Андрэй Казакевіч.